Edukimi i të rinjve për të vlerësuar ushqimin, në përpjekje për të pakësuar shpërdorimin e tij, ka një rrugë të gjatë përpara për të mundësuar ndryshimin e sjelljes që kërkohet për të çrrënjosur problemin tani dhe në të ardhmen.
“Kur kursen ushqim, bën një punë të mirë!” është një paketë edukative e krijuar për këtë qëllim. Kjo paketë edukative është rezultati i një procesi zhvillimi shkencor dhe gjithëpërfshirës, i cili përfshin grupe interesi si nga sektori publik ashtu dhe nga ai privat. Ajo u përgjigjet kërkesave në rritje të publikut për informacion mbi shkaqet dhe zgjidhjet për sa i përket shpërdorimit të ushqimit dhe kërkon të përfshijë fëmijët në një përpjekje botërore për të pakësuar shpërdorimin e ushqimit dhe për të zbutur ndikimet ekonomike, mjedisore dhe sociale që lidhen me të.
Paketa parashtron një perspektivë gjithëpërfshirëse të sistemeve ushqimore, njëkohësisht edhe një
stil dhe mjete komunikimi të përshtatshme për ndërgjegjësimin e fëmijëve mbi këto çështje. Ajo është krijuar për t’u dhënë mundësi mësuesve dhe edukatorëve të zgjedhin dhe të zbatojnë elementët që ata i konsiderojnë si më të përshtatshëm. Gjithashtu jepen shembuj dhe këshilla se si fëmijët mund të bëhen “kursimtarë të ushqimit” si dhe agjentë aktivë të ndryshimit nëpërmjet transmetimit të mesazheve te familjet dhe miqtë e tyre.
Përmbajtja e paketës është konceptuar në një format të tillë që mund të përshtatet lehtësisht sipas
llojeve të ndryshme të audiencave të synuara, qoftë në vendet e zhvilluara apo në ato në zhvillim.
Paketa do të kontribuojë në realizimin e synimit botëror për pakësimin e humbjes dhe shpërdorimit të ushqimit: Objektivat e Zhvillimit të Qëndrueshëm (OZHQ) synimi 12.3 – përgjysmimi i shpërdorimit të ushqimit për frymë në nivel botëror në pikat e shitjes dhe te konsumatorët dhe pakësimi i humbjeve të ushqimit përgjatë zinxhirëve të prodhimit dhe furnizimit (duke përfshirë humbjet pas korrjes) deri në vitin 2030, po ashtu edhe adresimi i synimeve të tjera të ngjashme, si kequshqyerja, ndryshimet klimatike dhe ruajtja e burimeve natyrore.
Kjo humbje nuk është vetëm çështje etike apo ekonomike. Mbetjet ushqimore shkaktojnë dëmtimin e mjedisit duke konsumuar burimet dhe ushqyesit natyrorë të tokës.
Kjo faqe interneti ka për qëllim edukimin e brezit të ri me materiale edukative dhe argëtuese mbi mbetjet ushqimore. Shpresojmë të keni mundësi të përfitoni nga 9 këshillat tona kryesore kundër mbetjeve ushqimore si dhe të argëtoheni në familjet tuaja.